（最近絕頂無聊既我...）
開始迷上睇漫畫同睇電視，亦同時有番睇卡通片既習慣！
當中首推本港台既[最遊記]同翡翠台既[keroro軍曹]
關於[最遊記]：
本港台有麗音選擇，所以我可以聽返日文原音，正～
故事以西遊記改編而成。
不過除左一樣係個四個主角，一樣妖怪成群同要去西方之外，我真係搵唔到其他相同之處 ～
今次既四位主角唔慈悲為懷都算啦！仲食煙飲酒追女仔樣樣齊。
本來手無搏擊之力、下下要人保護既玄奘三藏。搖身一變成開槍唔眨眼仲好憎人嘈生晒既僧人(其實咁樣仲可唔可叫僧人呢......)
而原著中花心好色既八戒今次好專一，外型亦斯斯文文好溫柔，不惜為保護愛人而大開殺戒。
反而本來唔多好女色既悟淨，今次就變為自命風流成日亂攪男女關係既人，但我又唔多覺得佢靚仔播！
而主角孫悟空算改得少，只係由勁聰明變成蠢蠢地咁......
總之響[最遊記]既虛擬世界，幾離經叛道既野都可以發生。
我諗睇都哩度......
大家都會明白[最遊記]差唔多係一個全新故事咁，所以如果你對原著有好深印象，又或者好中意原著咁我勸你唔好睇啦，因為你未必接受到ｄ同以前咁唔同既野......
仲有呀!!
如果你道德標準好高，你可能覺得:[哩班人攪咩呀，咁離譜既!!]
而我就始終覺得哩個係一個故事，所以無話接受唔到既。
說實在，有時我都會覺得自己睇個ｄ卡通片呀漫畫呀......入面既世界好變態，ｄ人正邪不分又好多背叛咁，但對我而言合埋本書之後就咩都完晒。
我亦唔希望哩ｄ野會響現實生活中發生。
話晒我只不過係正常人，要激響虛擬世界激夠佢好啦！
生活平淡簡單永遠最易開心滿足～～
不過今次我可以咁容易接受到[最遊記]，其實仲有一個好重要既因素.....
就係我好唔中意[西遊記]！
我唔明點解大部分既妖怪都係女人？
我亦唔信個四個人千辛萬苦去取天經就可以拯救世界！如果一部經書可以救到咁多人，咁ｄ人咁努力去對抗妖魔為咩呀？
仲有呀！
佢地又明知取經路途遙遠困難重重，都叫個四個人去做？
ｄ天神唔係好叻既咩，咁點解佢地又唔自己去取西經呀？
總之我就唔中意哩個[西遊記]啦！
不過改編自佢既其他故仔我又接受到，真係奇怪～
至於[keroro軍曹]：
我諗唔使我多講都大把人清楚過我，一班眼高手低毫無威脅既青蛙型外星人，話就話黎侵略地球，實際上佢地無比人食左都偷笑啦～～
由於主角keroro就係咁白癡，所以成個故事內容一樣無厘頭，每次都做到好似好搞笑咁，其實我每次睇完都唔覺得有咩野咁搞笑(可能我領悟能力不夠o瓜...)
但係曉儀鍾意睇，所以我都會繼續支持！
今日曉儀補開果間現代（生物）突然有故障，早左放學...
所以黎左我屋企，睇埋[keroro軍曹]先去補活學（英文）...
留言列表
